Bilim Hack

Markaziy bank banklarga sud qaroridan keyin hisoblangan foiz va neustoykani bekor qilib, pulni qarz oluvchilarga qaytarishni buyurdi

Markaziy bank tijorat banklariga sud qarzni undirish haqida qaror chiqargan kreditlarni tekshirib chiqishni topshirdi. Agar bank sud qaroridan keyin ham undirilgan summaga foiz yoki neustoyka (jarima, penya) hisoblashda davom etgan bo'lsa, bu hisoblarni bekor qilishi shart. Qarz oluvchidan allaqachon undirib olgan pulni esa qisqa muddatda qaytarishi kerak.

Bu qarorni Markaziy bankning Bank nazorati qo'mitasi qabul qildi. Qo'mita uning ijrosini ta'minlashni tijorat banklarining kuzatuv kengashlari va boshqaruvlariga yukladi.

Sud qaroridan keyin kredit qarzi o'smasligi kerak

Bu qoida Fuqarolik kodeksi 744-moddasining uchinchi qismida belgilangan. Sud kredit bo'yicha qarzni undirish haqida qaror chiqargach, qarorda ko'rsatilgan summaga foiz, jarima va penya boshqa hisoblanmaydi.

Banklar hisoblarni 10-dekabrgacha tekshirib, 2026-yil 25-dekabrgacha hisobot beradi

Banklarning ichki audit xizmatlari 2026-yil 10-dekabrgacha sud qarori chiqqan kreditlarni tekshiradi. Ular bank sud qaroridan keyin foiz va neustoyka hisoblashni to'xtatgan-to'xtatmaganini aniqlaydi. Auditorlar natijalarni va topilgan qoidabuzarliklarni bankning kuzatuv kengashi va boshqaruviga yetkazadi.

Bank boshqaruvlari 2026-yil 25-dekabrgacha Markaziy bankka qilingan ishlar va qancha pul qaytarilgani haqida batafsil hisobot yuborib, unga tasdiqlovchi hujjatlarni ilova qiladi.

Qarz oluvchilar bunday hisoblar haqida Markaziy bankka xabar berishi mumkin

Agar bank sud qaroridan keyin ham sizga foiz yoki neustoyka hisoblashda davom etgan bo'lsa, Markaziy bankning aloqa markaziga 71 200 00 44 raqami yoki 18 00 qisqa raqami orqali qo'ng'iroq qiling. Markaziy bankning «Bankda nima gap?» Telegram-botiga (@tajriba_lab_bot) yozishingiz ham mumkin.

O‘xshash maqolalar

Yangi maqolalar Telegram kanalimizda birinchi bo‘lib chiqadi

@bilim_hack
← Layfxaklar