Bilim Hack

2026-yil 27-martdan samolyotga ko'pi bilan ikkita powerbank olishingiz mumkin, parvoz paytida ularni zaryadlash taqiqlangan

Xalqaro fuqaro aviatsiyasi tashkiloti (ICAO) joriy etgan yangi qoidalar 2026-yil 27-martdan amal qilmoqda. Ularni tashkilot Kengashidagi 36 davlatning hammasi ma'qullagan, qoidalar ICAOga a'zo 193 mamlakatga taalluqli. Bu aviatsiyada ko'chma batareyalar bo'yicha birinchi yagona xalqaro standart. U xalqaro reyslarda uchadigan yo'lovchilarga tegishli.

Yo'lovchilar uchun o'zgargan qoidalar

  • Salonga ko'pi bilan ikkita powerbank olib kirishingiz mumkin.
  • Parvoz paytida powerbankni zaryadlash taqiqlanadi.
  • Powerbankni bosh ustidagi yuk javonlarida saqlash ham taqiqlanadi. Batareya qizib ketsa yoki yona boshlasa, ekipaj buni ko'rib, o'z vaqtida aralashishga ulgurishi kerak.
  • Topshiriladigan yukka powerbank hech qanday sharoitda qabul qilinmaydi.

Ikkitadan ortiq powerbanki bor yo'lovchi ortiqchasini uyda qoldirishi kerak.

Ruxsat etilgan sig'im

  • 100 Vt·soatgacha bo'lsa, alohida kelishuvsiz olib kirishingiz mumkin.
  • 100 dan 160 Vt·soatgacha bo'lsa, aviakompaniyadan oldindan rozilik olishingiz kerak.
  • 160 Vt·soatdan katta batareyani hech qaysi yo'lovchi samolyotiga olib kirib bo'lmaydi.

Oddiy powerbanklarning ko'pchiligi 100 Vt·soatdan ancha kichik. Sig'imi odatda qurilmaning o'zida Vt·soatda yozib qo'yilgan bo'ladi.

Yo'lda powerbank kerak bo'lsa

Uzoq reyslarda uchadigan yo'lovchilarga aeroportga powerbankni zaryadlab kelib, aeroportdagi zaryadlash joylaridan foydalanish tavsiya etiladi. Uzoq reyslarning ko'pchiligida samolyot ichida ham o'rindiq yonida USB orqali zaryadlash joyi va universal rozetkalar bor.

Aviakompaniyalar ICAO qoidalaridan qattiqroq talablar joriy etishi mumkin. Safardan oldin qaysi aviakompaniya reysida uchsangiz, shartlarni o'sha kompaniyadan aniqlab oling.

Qoidalar joriy etilishiga sabab

Qoidalar bortda litiy batareyalar bilan bog'liq bir qator hodisalardan keyin paydo bo'ldi. 2025-yil iyungacha AQSh Federal fuqaro aviatsiyasi boshqarmasi faqat AQShning o'zida 38 ta shunday holatni qayd etgan. 2025-yil oktabrda Air China kompaniyasining CA139 reysida yuqoridagi yuk javonida batareya yonib ketdi. Tergovchilar ma'lumotiga ko'ra, Air Busan kompaniyasining BX391 reysidagi yong'in yuqori javonda yotgan powerbankdan boshlangan.

Powerbank faqat batareyadan iborat. Unda haroratni nazorat qiladigan ichki tizim ham, datchiklar ham, g'ayrioddiy yuklamani kuzatib turadigan dastur ham yo'q.

Qoidalar ko'pchilikka taalluqli: IATA ma'lumotiga ko'ra, yo'lovchilarning taxminan 44 foizi safarga powerbank bilan chiqadi. Emirates, Qatar Airways, Singapore Airlines, Air India, Lufthansa, Cathay Pacific va British Airways yangi qoidalarga allaqachon o'tgan. Aviakompaniyalar bu haqda yo'lovchilarga chipta bron qilishda, ro'yxatdan o'tishda va samolyotga chiqishda xabar berishi shart.

Ekipaj a'zolari esa samolyotdan foydalanish talablariga ko'ra bunday powerbanklarni avvalgidek olib yurishi va ishlatishi mumkin.

🔗 Manba

O‘xshash maqolalar

Yangi maqolalar Telegram kanalimizda birinchi bo‘lib chiqadi

@bilim_hack
← Texnika