Maktab medallari to'g'risidagi nizom oliygohga kirishda imtiyoz bermaydi
Bitiruvchilarni oltin va kumush medallar bilan taqdirlash to'g'risidagi nizom O'zbekiston Vazirlar Mahkamasining 2019-yil 22-fevraldagi qarori bilan tasdiqlangan. U maktablar, jumladan ixtisoslashtirilgan maktablar va maktab-internatlar, shuningdek akademik litseylar bitiruvchilariga taalluqli. Nizomda medal sohiblariga oliygohga kirishda imtiyoz berilishi ko'zda tutilmagan.
Medallar o'qishni rag'batlantirish uchun ta'sis etilgan
Nizomga ko'ra, medallar o'quvchilarning o'qishga qiziqishini oshirishi, ular o'rtasida sog'lom raqobat uyg'otishi va iqtidorli o'quvchilarning bilimini rag'batlantirishi kerak.
Oltin medal uchun choraklik, yillik va yakuniy baholarning barchasi a'lo bo'lishi kerak
Oltin medalni 9-sinfni a'lo darajali shahodatnoma bilan tugatgan bitiruvchi oladi. Bundan tashqari, uning 10 va 11-sinflarda barcha fanlardan choraklik, yillik va yakuniy baholari a'lo bo'lishi shart. Akademik litsey bitiruvchisining esa barcha kurslarda barcha fanlardan yarim yillik, yillik va yakuniy baholari a'lo bo'lishi kerak.
Kumush medal uchun yillik baholar a'lo bo'lsa yetarli
Kumush medalni ham 9-sinfni a'lo darajali shahodatnoma bilan tugatgan bitiruvchi oladi. Uning 10 va 11-sinflarda, litseyda esa barcha kurslarda barcha fanlardan yillik baholari a'lo bo'lishi kerak.
Medal sohiblari ro'yxatini maktab yoki litsey tuzadi
Nizomda bitiruvchidan ariza olinishi ko'zda tutilmagan. Har yili 10-iyungacha direktorning o'quv ishlari bo'yicha o'rinbosari baholarni, sinf jurnallari va tabellarni tekshiradi, so'ng medalga munosib bitiruvchilar ro'yxatini tuzib, pedagogik kengashga topshiradi. Kimni taqdirlashni pedagogik kengash 14-iyungacha hal qiladi. Direktor medallarni 15-iyungacha tantanali ravishda topshiradi. Marosimda bitiruvchilarning ota-onalari, shuningdek mahalliy hokimiyat va fuqarolarning o'zini o'zi boshqarish organlari vakillari qatnashadi.
🔗 Manba