Yozgi issiqda turizm obyektlari uchun "siyesta" taklif qilindi
O'zbekiston Turizm qo'mitasi yoz mavsumida mehmonxonalar, muzeylar va restoranlarning ish tartibini o'zgartirishni taklif qildi. Sinov loyihasi Toshkent, Samarqand, Buxoro va Xivada 1-iyundan 31-avgustgacha amal qilishi ko'zda tutilmoqda.
Yangi tartibda kun uch qismga bo'linadi:
● ertalabki davr: soat 07:00 dan 13:00 gacha
● "siyesta" tanaffusi: 13:00 dan 17:00 gacha
● kechki davr: 17:00 dan 23:00 gacha
Tanaffus davomida turizm obyektlari to'liq yopilmaydi. Konditsionerlar ishlayveradi, asosiy xodimlar qoladi va mehmonlarga xizmat ko'rsatiladi.
Loyiha yana ikkita yangi dasturni ham ko'zda tutmoqda: "Tungi muzey" va "Kechki ekskursiya". Kafe va restoranlarda maxsus yozgi menyular tayyorlanadi, kechqurun gastronomik va madaniy tadbirlar ko'proq o'tkaziladi.
Muhim bir shart: yangi jadvalga o'tish xodimlarning ish haqiga ta'sir qilmasligi kerak.
Loyiha hozir jamoatchilik muhokamasi bosqichida. Muhokama 25-iyulgacha davom etadi.
