Soxta stomatolog ikki yil davomida odamlarning tishlarini YouTube’dagi darsliklar va ChatGPT yordamida davolagan

22 yoshli chexiyalik yigit litsenziyasiz to‘laqonli stomatologik klinika ochgan. U o‘zini shifokor sifatida tanishtirib, bemorlarni qabul qilgan, kanallarni tozalagan, og‘riqsizlantiruvchi ukollar qilgan va hatto tishlarni sug‘urib olgan.

U bilan birga 50 yoshli ayol va 44 yoshli erkak ishlagan — ayol hamshira rolini o‘ynagan va stomatologik materiallar topib bergan, erkak esa protezlar tayyorlagan.

Ularning hech biri tibbiy ma’lumotga ega bo‘lmagan — barcha bilimlarni internetdan olishgan: YouTube’da video ko‘rishgan, Google’dan qidirishgan va ChatGPT’dan foydalangan.

Ikki yil ichida ularning noqonuniy klinikasi orqali o‘nlab bemorlar o‘tgan. Umumiy daromad — 4 million chex kroni atrofida.

Eng qizig‘i — ularning ustidan bor-yo‘g‘i bitta shikoyat tushgan, shundan keyin politsiya tekshiruv boshlagan. Uchchalasini ham hibsga olishgan, endi ularga 8 yilgacha qamoq jazosi tahdid solmoqda.